ရန်ကုန်မြို့ကြီးဟာ ဖေဖော်ဝါရီ (၁) ရက်နေ့ထဲကစပြီး အဓိကလူစည်ကားရာနေရာတွေမှာ ငြိမ်းချမ်းစွာ ဆန္ဒထုတ်ဖော်ကြသူတွေအပြည့်နဲ့ ရှိနေခဲ့ပါတယ်။မြို့နယ်တိုင်းက လူကြီးလူငယ် ဘာသာမရွေး လမ်းမပေါ်ထွက်ကာ မိမိတို့ရဲ့ ယုံကြည်ချက်တွေအတွက် ရင်ထဲက ဆန္ဒတွေကိုထုတ်ဖော်ခဲ့ကြတာဖြစ်ပါတယ်။ ရန်ကုန်မြို့ရဲ့ နာမည်ကြီးနေရာတွေမှာ သံပြိုင်ကြွေးကြော်သံများနဲ့ ဆူညံခဲ့တာလည်းဖြစ်ပါတယ်။ဒီပုံရိပ်လေးတွေကပဲ ကမ္ဘာ့တစ်ဝှမ်းလုံးရဲ့ သတင်းမီဒီယာတွေအထိ ပြန့်နှံခဲ့တာပါ ။
နောက်ပိုင်းမှာတော့ ရန်ကုန်ဟာ တဖြည်းဖြည်း အရင်လို ငြိမ်းချမ်းစွာဆန္ဒထုတ်ဖော်ခွင့်တွေမရတော့ဘဲ နေရာတိုင်းမှာ အပစ်အခတ်တွေ ဖိနှိပ် ဖြိုခွင်းခံရမှုတွေရှိလာကာ ဖမ်းဆီးထိန်းသိမ်းခံရတာတွေလည်း မျာစွာကြုံတွေ့ခဲ့ရပါတယ်။ဒါကြောင့်လည်း ရန်ကုန်ဟာ ဆန္ဒဖော်ထုတ်သူတွေ နည်းပါးသွားခဲ့တာလည်းတွေ့ရပါတယ်။ဒီရက်ပိုင်းမှာတော့ ရန်ကုန်ရဲ့နွေဦးတော်လှန်ရေးကြီးက ပြန်လည်အသက်ဝင်လာခဲ့ပါတယ်။မြို့နယ်လိုက် လူငယ်တွေစုပေါင်းပြီး ပြောက်ကျားသပိတ်တွေကို လှုပ်ရှားခဲ့ကြတာလည်းဖြစ်ပါတယ်။
ယနေ့ ဧပြီလ (၃၀) ရက်နေ့မှာလည်း နေရာအသီးသီးက လူငယ်တွေစုပေါင်းကာ မိုးရေတွေကြားထဲမှာပြေးလွှားရင်း မြို့နယ်ပေါင်းစုံ အထွေထွေသပိတ်ကြီးကို လှုပ်ရှားခဲ့ကြတာဖြစ်ပါတယ်။ မိုးခြိမ်းသံတွေပျောက်ကွယ်သွားသည်ထိ လျှပ်စီးများကြားမှာ သံပြိုင်ဟစ်ကြွေးနေတဲ့ လူငယ်လေးတွေရဲ့ ပုံရိပ်တွေဟာ ပြည်သူတွေရဲ့ ရင်ကိုထိမှန်ခဲ့ပါတယ်။ဒါ့အပြင် လူငယ်တွေအားလုံး အောင်မြင်စွာလူစုပြန်ခွဲနိုင်ခဲ့ကြတယ်လို့လည်းဖော်ပြထားပါသေးတယ်။