ဒီနေ့မနက်မှာတော့ နိုင်ငံပိုင်သတင်းမီဒီယာတစ်ခုဖြစ်တဲ့ MRTV ကနေ သတင်းတစ်ခုထုတ်ပြန်လာခဲ့ပါတယ်။
သတင်းထုတ်ပြန်ချက်တွင် အကျဥ်းထောင်စခန်းအသီးသီးတွင် အကျဥ်းကျခံနေကြရသော အကျဥ်းသား/အကျဥ်းသူ ၁၃၁၆ ဦးတို့ကို ရာဇဝတ်ကျင့်ထုံးဥပဒေပုဒ်မ ၄၀၁၊ပုဒ်မခွဲ (၁)ခွဲအရ နောက်တစ်ကြိမ်ပြစ်မှုထပ်မံ ကျူးလွန်ပါက ထိုပြစ်ဒဏ်အပြင် ယခုကျခံရန်ကျန်ရှိသော ပြစ်ဒဏ်များကိုပါ ဆက်လက်ကျခံပါမည်ဟု စည်းကမ်းသတ်မှတ်ချက်ဖြင့် ကျခံရန် ကျန်ရှိသော ပြစ်ဒဏ်များကို လျှော့ပေါ့ပြီး လွတ်ငြိမ်းချမ်းသာခွင့် ပြုကြောင်းပါရှိပါတယ်။
ထို့အပြင် ဆန္ဒပြမှုများတွင်ပါဝင်ခဲ့ပြီး အရေးယူခံထားရပြီး တရားစွဲဆိုခြင်းခံထားရသည့် (၄၃၂၀)ဦးတို့၏ ကြားနာစစ်ဆေးဆဲ ပြစ်မှုဆိုင်ရာအမှုများကို ပိတ်သိမ်းပြီး အမှုမှ လွတ်ပေးမည် ဖြစ်ကြောင်း သိရှိရပါတယ်။