သင်ဟာ ဂျင်းဘောင်းဘီကို အမြဲဝတ်ဆင်နေတဲ့ သူတစ်ယောက်ဆိုရင် သင်ရဲ့ ဂျင်းဘောင်းဘီပေါ်က အိတ်ကပ်လေးတွေကို သတိထားမိပါသလား။ အဲ့ဒီ အိတ်ကပ်လေးတွေမှာ အသုံးဝင်ပြီး အလွန်သေးငယ်တဲ့ အိတ်လေးတစ်ခုပါတယ်။
ဒါပေမယ့် လူတော်တော်များများက အိတ်ကပ်လေးပါတာ သတိထားမိကြပေမယ့် အလှဆင်ထားတာလို့ပဲ သိထားကြပါတယ်။ တစ်ချိန်တုန်းက ဒီဇိုင်နာတွေက ဒီအိတ်ကပ်လေးကို ရည်ရွယ်ချက်ရှိရှိနဲ့ ထည့်ထားခဲ့တာပါ။
လက်ပတ်နာရီတွေ မပေါ်ခင်တုန်းက အိတ်ဆောင်နာရီတွေခေတ်စားခဲ့ကြပါတယ်။ ခရီးသွားတာပဲဖြစ်ဖြစ်၊ အပြင်သွားတာပဲ ဖြစ်ဖြစ် စမတ်ကျကျလေးနဲ့ အိတ်ဆောင်နာရီလေးတွေတစ်ပါးတည်းယူသွားနိုင်အောင် ရည်ရွယ်ပြီး ဂျင်းဘောင်းဘီတွေမှာ အိတ်ကပ်ငယ်ထည့်ပေးထားတာ ဖြစ်ပါတယ်။
နာရီအိတ်ကပ်ပါတဲ့ ဂျင်းဘောင်းဘီတွေကို Levi Strauss & Co က စတင်ထုတ်လုပ်တာဖြစ်ပါတယ်။ ယနေ့ခေတ်စားနေတဲ့ “Levis 501” ဂျင်းဘောင်းဘီကို ၁၈၉၀ ခုနှစ်မှာ စတင်အသုံးပြုခဲ့ပါတယ်။
အိတ်သေးသေးလေးပါတဲ့ ဘောင်းဘီကို အိတ်ကပ်ငါးအိတ်ပါဘောင်းဘီလို့ ခေါ်ကြပေမယ့် အိတ်သေးသေးလေးက ပဉ္စမမြောက် အိတ်ကပ်တော့ မဟုတ်ပါဘူး။
ပဉ္စမအိတ်ကပ်က အမှန်တကယ်မှာ ဘောင်းဘီရဲ့ နောက်ကျောဘယ်ဘက်တွင်ရှိပြီး ၁၉၀၁ ခုနှစ်မှာ “Levi's 501 “ ဂျင်းဘောင်းဘီကို ထည့်သွင်းထားခဲ့တာ ဖြစ်ပါတယ်။ ဂျင်းဘောင်းဘီအများစုမှာ ဒီလို အိတ်ကပ်လေးတွေ ပါကြပေမယ့် နောက်ပိုင်းထွက်ရှိလာတဲ့ ဘောင်းဘီတွေမှာတော့ မပါလာတာ တွေ့ရပါတယ်။