အလင်းနှစ် 50 အကွာရှိ စူပါဂြိုလ် မှာ လူသားများအနေဖြင့် ခြောက်ခြားဖွယ်ရာ များကို James Webb အာကာသကြည့်မှန်ပြောင်းမှတစ်ဆင့် လာမည့်ရက်သတ္တပတ်များအတွင်း ကြည့်ရှုနိုင်မှာဖြစ်ကြောင်း NASA ကပြောကြားခဲ့ပါတယ်။ 55 Cancri e လို့ခေါ်တဲ့ ဂြိုဟ်ဟာ "နေနှင့်တူသော ကြယ်" ကြီးနဲ့ အလွန်နီးကပ်စွာ လည်ပတ်နေတာကြောင့် မျက်နှာပြင်အခြေအနေများဟာ ငရဲပြည်ကဲ့သို့ အဆက်မပျက် လောင်ကျွမ်းနေကြောင်း တွေ့ရှိရပါတယ်။
ဖော်ပြချက်အရ 55 Cancri e ဟာ ၎င်းရဲ့နေနဲ့ မိုင်ပေါင်း 1.5 သန်းလောက်သာ ဝေးတာကြောင့် ဂြိုလ်မျက်နှာပြင်ဟာ အလွန်ပူပြင်းပါတယ်။ "မျက်နှာပြင် အပူချိန်ဟာ ကျောက်တုံးတွေနဲ့ သတ္တုတွေရဲ့ အရည်ပျော်မှတ်ထက် အဆပေါင်းများစွာ မြင့်မားနေတာကြောင့် ဂြိုလ်ရဲ့ နေ့ဘက်ခြမ်းဟာ ချော်ရည်တွေနဲ့ သမုဒ္ဒရာတွေထဲ ဖုံးလွှမ်းနေတယ်လို့ ယူဆရပါတယ်" ဟု NASA က ပြီးခဲ့သည့် သီတင်းပတ်တွင် ဖော်ပြခဲ့ပါတယ်။
ကမ္ဘာကသာ နေနဲ့ အများကြီး ပိုနီးကပ်ခဲ့မယ်လို့ စိတ်ကူးကြည့်ပါ။ နီးကပ်လွန်းတော့ ဒီဆွဲငင်အားက ကမ္ဘာကိုရပ်တန့်နေစေပြီး တဖက်က နေ့ခင်းဘက်မှာ အမြဲတမ်း ပိတ်လှောင်နေပြီး နောက်တစ်ဖက်က အဆုံးမဲ့ အမှောင်ထဲမှာ ကျန်နေခဲ့ပါမယ်။ ပြီးတော့ သမုဒ္ဒရာတွေ ဆူပွက်လာပြီး ကျောက်တုံးတွေ အရည်ပျော်လာကာ တိမ်တွေက ချော်ရည်တွေအဖြစ် ရွာချလာပါမယ်" လို့ NASA ကပြောပြပါတယ်။
"အခြေအနေကတော့ မျက်နှာပြင်က အပူတက်လာပြီး အရည်ပျော်ကာ နေ့ဘက်မှာ အငွေ့ပျံသွားပြီး အလွန်ပါးလွှာသောလေထုတစ်ခု ဖြစ်လာကာ ညနေခင်းမှာအခိုးအငွေ့တွေက အေးမြပြီး မျက်နှာပြင်ပေါ်ကို ချော်ရည်အစက်လေးတွေအဖြစ်ရွာချပြီး ညမိုးချုပ်တာနဲ့ တစ်ဖန်ပြန်အခဲပြန်ဖြစ်သွားပါတယ်" လို့ရှင်းပြထားပါတယ်။ James Webb အာကာသကြည့်မှန်ပြောင်းဟာ လာမယ့် ရက်သတ္တပတ်များအတွင်း အပြည့်အဝလည်ပတ်နိုင်မည်ဟု မျှော်လင့်ရပြီး ၎င်း၏ ပထမဆုံးသော စူးစမ်းလေ့လာမှုများကို နွေရာသီတွင် မျှော်မှန်းထားကြောင်း NASA က ပြောကြားခဲ့ပါတယ်။