တော်လှန်ရေးအတွက် လုံးဝသွေးမအေးဘဲ အင်တိုက်အားတိုက်ပါဝင်အားဖြည့်နေကြတဲ့ နိုင်ငံတကာရောက်မြန်မာများရဲ့ အပတ်စဥ် ရံပုံငွေရှာဖွေရေးအတွက် စျေးရောင်းချပွဲကို အောက်တိုဘာလ (၂)ရက်နေ့က ကျင်းပပြုလုပ်ခဲ့ကြတာပဲဖြစ်ပါတယ်။
ကဗျာ၊ ဂီတ၊ ရိုးရာတိုင်းရင်းသားဂီတ၊ အကများနဲ့ မြန်မာ့အစားအစာအစုံအလင်ပါဝင်သော “ကြယ်စင်များရဲ့အလင်းကောင်းကင်” လို့အမည်ပေးထားတဲ့ ရံပုံငွေရှာဖွေပွဲကြီးကို လန်ဒန်အနောက်ပိုင်း Feltham မြို့မှာ ကျင်းပခဲ့ကြပါတယ်။
ကြယ်စင်များရဲ့အလင်းကောင်းကင်ပွဲမှာ လန်ဒန်နိုင်ငံက တော်လှန်ရေးမှာ တတပ်တအားပါဝင်ကြတယ့် မိသားစုတွေ အပန်းပြေစေဖို့ Live Music & Karaoke အစီအစဥ်၊ အစားသောက်မျိုးစုံရောင်းချမယ့်အစီအစဥ်၊ ကံစမ်းမဲလက်မှတ်ဝယ်ယူပြီး အမှတ်တရပစ္စည်းလေးတွေရမယ့် အစီအစဥ်တွေအပြင် သားသားမီးမီးလေးတွေ ပါဝင်ကစားနိုင်မယ့် ပျော်ပွဲရွှင်ပွဲအစီအစဥ်တွေပါ ပါဝင်ပါတယ်။
ရန်ပုံငွေပွဲမှာ အင်္ဂလိပ် နာမည်ကြီးပန်းချီဆရာ Mark Howard ရေးဆွဲထားတဲ့ ဒေါ်အောင်ဆန်းစုကြည် ပန်းချီကား ကို စတာလင်ပေါင် ၂၇၀၀၊ မြန်မာငွေ ကျပ်သိန်း ၉၀ ခန့်နဲ့ လေလံအောင်သွားခဲ့တာပဲဖြစ်ပါတယ်။ ဒီပန်းချီကားကို မြန်မာတစ်ဦးက အမြင့်ဆုံးစျေးနဲ့ လေလံဆွဲပြီး၊ ဝယ်ယူသွားခဲ့တာပဲ ဖြစ်ပါတယ်။
လန်ဒန်မှာ ရောက်ရှိနေတဲ့ Miss Myanmar Universe သူဇာဝင့်လွင်နဲ့ Model မေမြတ်နိုး လဲ ကြယ်စင်များရဲ့ အလင်းကောင်းကင် Fund raising ပွဲကို လာရောက်ပြီး ပါဝင်ကူညီအားဖြည့်ခဲ့ကြပါတယ်။