နွေဦးရန်ပုံငွေအတွက် တစ်ကိုယ်တော် ဖျော်ဖြေပွဲကနေ အမေရိကန်ဒေါ်လာ (၃၄၀၀၀၀) ရရှိခဲ့ အဆိုတော်ဆောင်းဦးလှိုင်

အဆိုတော် ဆောင်းဦးလှိုင်ကတော့ သီချင်းကောင်းတွေကို ပရိသတ်ရင်ထဲရောက်အောင် သီဆိုနိုင်သူတစ်ယောက်ပါ။ ဆောင်းဦးလှိုင်ဟာ လတ်တလောမှာတော့ ပြည်ပမှာ နေထိုင်နေပြီး ကိုယ်ပိုင်သံစဉ်သီချင်းတွေနဲ့အတူ ဂီတလှုပ်ရှားမှုတွေ ဆက်လက်ပြီးတော့ လုပ်ဆောင်နေဆဲ ဖြစ်ပါတယ်။  သူဟာ ဆေးပညာဘွဲ့ရတစ်ဦးလည်း ဖြစ်ပြီး နောက်ပိုင်းမှာတော့ ကိုယ်တိုင်ရေးသားပြီး ကိုယ်တိုင်သီဆိုခဲ့တဲ့ တကိုယ်တော်တေးအယ်လ်ဘမ်ပေါင်း ၁၀ ချပ်ထက်မနည်း ထွက်ရှိခဲ့ပြီး ဖြစ်ပါတယ်။ 

လက်ရှိမှာ ဆောင်းဦးလှိုင်က နိုင်ငံခြားမှာရောက်နေပေမယ့် စစ်အာဏာရှင်ကို တော်လှန်တဲ့နွေဦးတော်လှန်ရေးကြီးမှာ တတ်တတ်ကြွကြွ ပါဝင်နေတာလည်း ဖြစ်ပါတယ်။ ဒါအပြင် ဆောင်းဦးလှိုင်က မြန်မာ့နွေဦးတော်လှန်ရေး ရန်ပုံငွေအတွက် တစ်ကိုယ်တော် ဂီတဖျော်ဖြေပွဲကို အမေရိကန်နိုင်ငံမြို့ကြီး ၇ မြို့မှာ ကျင်းပခဲ့အပြီးမှာ ရန်ပုံငွေအမေရိကန် ဒေါ်လာ ၃၄၀,၀၀၀ ရရှိထားပြီဖြစ်တယ်လို့ သူ့ရဲ့ လူမှုကွန်ရက် စာမျက်နှာတွင်ဖော်ပြထားပါတယ်။

အဆိုတော်ဆောင်းဦးလှိုင်ရဲ့ “နွေဦးတော်လှန်ရေး ရန်ပုံငွေရှာဖွေခရီးစဉ်”လို့ အမည်ပေးထားတဲ့ တကိုယ်တော်နယ်လှည့်ဖျော်ဖြေပွဲကိုတော့ ပြီးခဲ့တဲ့ သြဂုတ် ၂၈ ရက်နေ့ကစတင်ခဲ့တာဖြစ်ပြီး အောက်တိုဘာလအတွင်း မြို့ကြီး (၃) မြို့မှာ ဆက်လက်ဖျော်ဖြေမယ်လို့သိရတယ်။

“Utica မြို့လေးရဲ့စည်းလုံးမှုနဲ့စေတနာကအံ့မခန်းပါဘဲ။ စေတနာကောင်းလွန်းတဲ့မြို့လေးမှာ  လက်မှတ်စောင်ရေ ၃၀၀ကျော်ရောင်းခဲ့ရတယ်။ ကျနော့်ဂစ်တာတစ်လုံး ၉၅၀၀$ နဲ့လေလံအောင် လှူဒါန်းအပြီး လေလံမအောင်လိုက်တဲ့ နောင်တော်က  $ ၁၀၀၀၀ လှူမယ်ဆိုတော့ လေးစားလွန်းလို့ တီးနေတဲ့ ( ဆက်လက် အသုံးပြုရမယ့် ) ဂစ်တာ ပေးပစ်ခဲ့တယ်။  ကျနော့်Jean waist coat ကိုလည်း စေတနာရှင် ညီမတစ်ယောက်က $၉၀၀၀ လောက်နဲ့ လေလံဆွဲတယ်။ ကျနော့်လက်ထဲလာထည့်တဲ့ Tips & donations   $ ၁၁၆၀၀ အားလုံးပြန်လှူတယ်။  အခြားအခြားသော ပရိသတ်များရဲ့ ဝိုင်းဝန်းမှုနဲ့ စုစုပေါင်း $၆၀၀၀၀ တိတိရအောင် ရန်ပုံငွေရှာနိုင်ခဲ့ပါတယ်။ Utica မြို့လေးရဲ့ စည်းလုံးမှုနဲ့စေတနာက အံ့မခန်းပါဘဲ။ ဦးဆောင်ကြသူတွေက အသေချာကို စီစဉ်ကြလိမ့်မယ်၊ တော်လှန်ရေးလူငယ်များ လက်ဝယ်အရောက်ပို့ကြဖို့။ မနက်ဖြန် Albany မြို့မှာ ဘောလုံးကစားပါမယ်။ ရောက်လေရာအရပ်မှာ စိတ်ကောင်းစေတနာကောင်း အလေ့ကျင့်ကောင်းတွေထွန်းကားစေဖို့ ရည်ရွယ်ပါတယ်။ Photo quality မကောင်းလှပေမယ့် စက်တွေကြားမှာ ရုန်းကန်နေတဲ့ ကျနော် မြို့(၇) မြို့အပြီး ရန်ပုံငွေ ၃၄၀၀၀၀$ ရှာနိုင်ခဲ့ပါကြောင်း” သူ့ရဲ့ လူမှုကွန်ရက် စာမျက်နှာတွင်ဖော်ပြထားပါတယ်။

အမေရိကန်မြို့ကြီးတွေမှာ ဖျော်ဖြေပွဲတွေအသီးသီးက ရရှိတဲ့ ရန်ပုံငွေတွေကိုတော့ မြန်မာ ပြည်အနယ်နယ်အရပ်ရပ်က လိုအပ်တဲ့ နေရာတွေအသီးသီးကို ပေးပို့လှူဒါန်းသွားမှာ ဖြစ်တယ်လို့ ဆိုပါတယ်။ အောက်တိုဘာ (၉) ရက်တွင် ဝါရှင်တန်မြို့၊ အောက်တိုဘာ (၁၇)ရက်တွင် ဆန်ဖရစ္စကို၊ အောက်တိုဘာ (၂၃)ရက်တွင် ဒါလစ်မြို့တွေမှာ ဆက်လက်ဖျော်ဖြေသွားမှာဖြစ်ပါတယ်။

Source : Song Oo Hlaing's Facebook Acc