ဟာသ လူရွှင်တော် မွန်လေးကတော့ လတ်တလောမှာ လူမှုရေးအကျိုးပြုပရဟိတလုပ်ငန်းတွေကို စိတ်အားထက်သန်စွာ ပိုမို လုပ်ဆောင်နေတာတွေ့ မြင်ရပါတယ်။ ဒီလိုချိန်ကာလတွေမှာ သာမာန်ပြည်သူတွေအပြင် အလွှာအသီးသီးက အနုပညာသမားတချို့ပါ စားဝတ်နေရေးအတွက် အခက်အခဲဖြစ်လာခဲ့ပါတယ်။လူရွှင်တော် မွန်လေးက ယခုလိုမျိုး ခက်ခဲနေတဲ့ သူတွေအတွက် သူ့ရဲ့အနုပညာကြေးနဲ့အပြင် စေတနာရှင်များရဲ့ ထည့်ဝင်လှူဒါန်းပေးမှုဖြင့် ကူညီထောက်ပံ့ လှူဒါန်းပေးတာဖြစ်ပါတယ်။
သူ့ရဲ့ လှူဒါန်းမှုအစုစုတို့ကိုလည်း ပရိသတ်တွေနဲ့ ထပ်တူ သာဓုခေါ်ဆိုနိုင်အောင် လူမှုကွန်ယက်မှာ ပြန်လည်ဖော်ပြပေးတာ တွေ့ရပါတယ်။ ယခုမှာလည်း လူရွှင်တော် မွန်လေးက ကြည့်မိသူတိုင်း ကြည်နူးပီတိဖြစ်စေမယ့် သူ့ရဲ့ အလှူလေးကို ဖော်ပြလာခဲ့ပါတယ်။ ဒီတစ်ခါအလှူကလည်း အနီးအနားက လူအယောက် (၅၀၀) စာအတွက် ကိုယ်တိုင်ချက်ပြုတ်ပြီး သဒ္ဒါတရားထက်သန်စွာ ကျွေးမွေးခဲ့တာ ဖြစ်ပါတယ်။
ဒါ့အပြင် ကျွေးမွေးလှူဒါန်းနေတဲ့နေရာကို လာရောက်သုံးဆောင်ကြတဲ့ ပြည်သူတွေအတွက် အဝတ်အထည်များနှင့် လက်သန့်ဆေးများကိုလည်း လှူဒါန်းပေးခဲ့ကြောင်း ဖော်ပြထားပါတယ်။ လာရောက်သုံးဆောင်ကြတဲ့ ပြည်သူတွေကလည်း မြိန်ရေရှက်ရေ အားပါးတရစားသောက်နေတာတွေကတော့ တကယ့်ကို ကြည်နူးဖွယ် ကောင်းလှပါတယ်။ မွန်လေးရဲ့ မှတ်တမ်းတင်အလှူရုပ်သံလေးကို ကြည့်ရှုရင်း ဒီထက်မကလှူဒါန်းနိုင်အောင် ပရိသတ်တွေကလည်း ဆုမွန်ကောင်းတောင်းပေးကြပါဦးနော်။
သတင်း အရင်းအမြစ်៖ Source - မွန်လေး