Psychology စိတ်ပညာဘာသာရပ်ကို ဘယ်သူတွေတက်ရောက်သင့်လဲ။

အခုခေတ်မှာဆိုရင် တော်တော်များများက စိတ်ပညာကို အလေးပေးလာကြသလို စိတ်ပညာနဲ့ပတ်သက်ပြီးလည်း တော်တော်များများက လေ့လာနေကြပါပြီ။ဒီနေ့မှာတော့ Fields of Specialization in Psychology(စိတ်ပညာနယ်ပယ်များ)အကြောင်းကို တင်ဆက်ပေးလိုက်ပါတယ်။

1. Clinical Psychology(ကုခန်းစိတ်ပညာ)

စိတ်လှုပ်ရှားမှုနဲ့ဆိုင်တဲ့ပြဿနာတွေ၊အပြုအမူနဲ့ဆိုင်တဲ့ ပြဿနာတွေ၊စိတ်ဝေဒနာတွေကို ကုသပေးခြင်းတို့ကို ပြုလုပ်ပေးတဲ့နယ်ပယ်တစ်ခုဖြစ်ပါတယ်။Clinical Psychologist တွေကိုတော့ ဆေးရုံ၊စိတ်ကျန်းမာရေးဋ္ဌာန၊ဆေးဝါးသုံးစွဲသူတွေကို ပြုစုစောင့်ရှောက်ပေးတဲ့ ပြန်လည်ထူထောင်ရေးဋ္ဌာနတွေနဲ့နှစ်သိမ့်ဆွေးနွေးအကြံပေးလုပ်ငန်းတွေမှာ တွေ့နိုင်ပါတယ်။

2. Counselling Psychology(အကြံပေးညိနှိုင်းစိတ်ပညာ)

Counselling လုပ်တာတို့ Counsellor တွေနဲ့တွေ့ဆုံတယ်ဆိုတာက ဒီခေတ်မှာ တော်တော်အသုံးပြုလာကြပါပြီ။ဒီနယ်ပယ်မှာရှိတဲ့ ပညာရှင်တွေကတော့ နေ့စဥ်နဲ့အမျှ ကြုံတွေ့နေရတဲ့ လုပ်ငန်းဆောင်တာများနဲ့ပတ်သက်တဲ့ အသင့်အတင့်သော ပြဿနာအခက်အခဲများကို ဖြေရှင်းပေးရပါတယ်။စာမေးပွဲနဲ့ပတ်သက်တဲ့ အလွန်စိုးရိမ်ပူပန်မှုတွေ၊အလုပ်နဲ့ပတ်သက်တဲ့ စိတ်ဖိစီးမှုတွေ၊အလုပ်ရွေးချယ်မှုနဲ့ပတ်သက်တဲ့ မရေရာမသေချာပြဿနာများကို ဆွေးနွေးသူနဲ့အတူတူ အဖြေရှာကြပါတယ်။

3. Biological Psychology or Physiological Psychology(ဇီဝကမ္ပဆိုင်ရာစိတ်ပညာ)

ဇီဝကမ္ပဆိုင်ရာစိတ်ပညာရှင်များကတော့ ဇီဝဗေဒဆိုင်ရာဖြစ်စဥ်များနဲ့ အပြုအမူဖြစ်စဥ်များမှာရှိတဲ့ဆက်နွယ်မှုတွေကို လေ့လာကြပါတယ်။ဒီနယ်ပယ်ဟာ အပြုအမူနဲ့ဆေးဝါးများ၊ဦးနှောက်ရဲ့လုပ်ငန်းစဥ်များ စသည်တို့နဲ့ဆက်နွယ်မှုကို ရှာဖွေလေ့လာပြုလုပ်ပါတယ်။

4. Experimental Psychology(စမ်းသပ်မှုစိတ်ပညာ)

ဒီနယ်ပယ်ကတော့ အပြုအမူနဲ့စိတ်ဖြစ်စဥ်တွေမှာပါဝင်တဲ့ အာရုံသိခြင်း၊သင်ယူခြင်း၊မှတ်ဉာဏ်စတဲ့အခြေ ခံဆက်နွယ်မှာတို့ကို ရှာဖွေပြုလုပ်ပါတယ်။စမ်းသပ်ခန်းတွေထဲမှာ ထိန်းချုပ်လေ့လာမှုတို့ကို ပြုလုပ်ပါတယ်။

5. Educational And School Psychology(ပညာရေးစိတ်ပညာ)

ပညာရေးစိတ်ပညာရှင်တွေကတော့ ပညာရေးမှာ ထိရောက်အောင်မြင်တဲ့သင်ကြားမှု၊သင်ယူမှုနည်းလမ်းတွေကို ရှာဖွေဖော်ထုတ်ပေးပါတယ်။ပညာရေးစိတ်ပညာရှင်များဟာ ပညာရေးနဲ့ဆိုင်တဲ့ သင်ရိုးညွှန်းတမ်းတွေတိုးတက်မှုရှိအောင် သုတေသနပြုလုပ်ခြင်း၊ဆရာ၊ဆရာမများအား သင်တန်းပေးခြင်းများကို လုပ်ဆောင်ပါတယ်။

6. Developmental Psychology(ဖွံ့ဖြိုးမှုစိတ်ပညာ)

မိခင်ရဲ့ဝမ်းတွင်းမှာ ရှိနေတဲ့ အချိန်ကာလက စပြီး အိုမင်းမစွမ်းအရွယ်အထိ ဘဝသက်တမ်းတစ်လျှောက်မှာ ဖြစ်ပေါ်တဲ့ လွှမ်းမိုးတဲ့အချက်တွေကို လေ့လာဖို့ စိတ်ဝင်စားကြပါတယ်။သီးခြားစွမ်းရည်ဖြစ်တဲ့ ကလေးတစ်ယောက်ရဲ့ အသက်အပိုင်းအခြားအလိုက် ဘာသာစကားတတ်ကျွမ်းမှုကိုလည်း လေ့လာတဲ့ ဘာသာရပ် ဖြစ်ပါတယ်။

7. Industrial /Organizational Psychology(စက်မှုအဖွဲ့အစည်းဆိုင်ရာ စိတ်ပညာ)

စိတ်ပညာဆိုင်ရာယေဘုယျသဘောထားတွေကို အသုံးပြုပြီး အလုပ်သမားများ၊လုပ်ငန်းရှင်များ၊လုပ်ငန်းခွင်ကျေနပ်မှုရှိရန် လေ့လာမှုတွေကို ပြုလုပ်ပါတယ်။ဒီနယ်ပယ်က စိတ်ပညာရှင်များကတော့ စက်မှုနဲ့အဖွဲ့အစည်းဆိုင်ရာ လုပ်ငန်းခွင်မှာ အလုပ်သမားများကို ရွေးချယ်ခြင်း၊နေရာချထားပေးရေးတို့မှာ အဓိက လုပ်ဆောင်ပါတယ်။

8. Engineering Psychology(အင်ဂျင်နီယာစိတ်ပညာ)

လူတွေအမှားနည်နည်း၊အန္တရာယ်ကင်းကင်းရှင်းရှင်းနဲ့လုပ်ငန်းတွင်ကျယ်ဖို့ ဘယ်လိုစက်ကိရိယာတွေ ဖန်တီးသင့်လဲ။နောက်ပြီးတော့ လူနဲ့စက် အံဝင်ခွင်ကျ ဖြစ်အောင်ဘယ်လိုလုပ်သင့်လဲ။Design တွေ ဘယ်လိုရွေးဆွဲသင့်သလဲဆိုတာတွေကို အဓိကလုပ်ဆောင်ပါတယ်။

9. Social Psychology(ဆက်ဆံရေးစိတ်ပညာ)

လူတစ်ယောက်ချင်းအပေါ်မှာ ဆက်ဆံတဲ့ပတ်ဝန်းကျင်၊ဆက်ဆံရေးဖြစ်စဥ်တွေကို တိကျတဲ့အကျိုးသက်ရောက်မှုကိုလေ့လာတဲ့နယ်ပယ်တစ်ခုဖြစ်ပါတယ်။များသောအားဖြင့် လူတွေဟာ တစ်ယောက်တည်းမနေပဲ ပတ်ဝန်းကျင်နဲ့အုပ်စုဖွဲ့နေကြတဲ့အတွက် ပတ်ဝန်းကျင်ရဲ့လွှမ်းမိုးမှုကြောင့်ဖြစ်ပေါ်လာတဲ့ တစ်ဦးချင်းအပြုအမူတွေ၊အုပ်စုထဲမှာ လူတွေ ဘယ်လိုပြုမူရပ်တည်နေလဲဆိုတာကို လေ့လာကြပါတယ်။

10. Personality Psychology(ကိူယ်ရည်ကိုယ်သွေးစိတ်ပညာ)

လူတွေနဲ့ကိုယ်ရည်ကိုယ်သွေးနဲ့ထူးခြားတဲ့အရာတွေ၊အဓိကကျတဲ့အချက်အလက်တွေကိုစူးစမ်းလေ့လာရှာဖွေကြပါတယ်။ကိုယ်ရည်ကိုယ်သွေးစိတ်ပညာရှင်အများစုကတော့ ကိုယ်ရည်ကိုယ်သွေးဖွံ့ဖြိုးပုံအဆင့်ဆင့်တွေ၊လူတွေရဲ့လုပ်ဆောင်မှုအပေါ်မှာ ကိုယ်ရည်ကိုယ်သွေးရဲ့ လွှမ်းမိုးမှုတွေကို လေ့လာဖော်ထုတ်တဲ့ပညာရပ် ဖြစ်ပါတယ်။

11.Environmental Psychology(ပတ်ဝန်းကျင်ဆိုင်ရာ စိတ်ပညာ)

လူနေထူထပ်ခြင်း၊ဆူညံသံ၊လေထုညစ်ညမ်းမှုစတဲ့အရာတွေကြောင့် လူတစ်ယောက်ရဲ့အပြုအမူကို ဘယ်လိုထိခိုက်နစ်နာမှုကို ဖြစ်ပေါ်စေသလဲ။လုပ်ငန်းခွင်နဲ့အလုပ်သမားတွေ အပန်းဖြေမှုရဖို့အတွက် စိတ်ပိုင်းဆိုင်ရာ ပတ်ဝန်းကျင်ကောင်းတွေ ဘယ်လိုဖန်တီးရမလဲဆိုတာတွေကို လေ့လာတဲ့ပညာရပ်ဖြစ်ပါတယ်။