ယခုနှစ်ကာလအတွင်း မြန်မာနိုင်ငံ နေရာတချို့တွေမှာ မိုးသည်းထန်စွာ ရွာသွန်းမှုကြောင့် ရေကြီးရေလျှံမှုတွေဖြစ်ပေါ်နေတဲ့အပြင် တောင်ကမ်းပါး ပြိုကျမှုတွေပါ ပိုမိုဖြစ်ပွားလာတာတွေ့ရပါတယ်။ ဒီလို တောင်ကမ်းပါး ပြိုကျမှုတွေမှာ နေအိမ်များပိမိပြီး လူသေဆုံးတာတွေလည်း ရှိလာခဲ့ပါတယ်။ စက်တင်ဘာ (၂၇) ရက် ယမန်နေ့ နံနက်ပိုင်းကလည်း ချင်းပြည်နယ် ၊ တီးတိန်မြို့နယ် ၊ ဆိုဇန်ကျေးရွာမှာ တောင်ကမ်းပါးပြိုကျခဲ့တယ်လို့ ကြားသိရပါတယ်။
အဆိုပါ တောင်ကမ်းပါးပြိုကျမှုကြောင့် လူနေအိမ် (၃) လုံးပျက်စီးပြီး (၄)လုံးရွှေ့ပြောင်းထားခဲ့ရပါတယ်။ ယင်းဖြစ်စဥ်မှာ မြေများပိမိပြီး လူနေအိမ်များ ပျက်စီးသွားခဲ့ပေမယ့် လူထိခိုက်ဒဏ်ရာမရရှိခဲ့ဘူးလို့ သိရပါတယ်။ ဒါ့အပြင် ကလေးမှ ဆိုဇန်ရွာသို့ မရောက်ခင် တောင်စောင်းလမ်း တစ်နေရာမှာလည်း ပေ (၂၀၀)ခန့် တောင်ကမ်းပါးပြိုထားတာကြောင့် ကားများ သွားလာမှုခက်ခဲနေခဲ့ပါတယ်။
လက်ရှိမှာတော့ တောင်ကမ်းပါးများ ပြိုကျတဲ့ နေရာတွေကို ကယ်ဆယ်အဖွဲ့များက ရှင်းလင်းမှုတွေ ပြုလုပ်ဆောင်ပေးနေတယ်လို့ သိရပါတယ်။ ဆိုဇန်ကျေးရွာဟာ ကလေး-တီးတိန်လမ်းမပေါ်မှာ တည်ရှိပြီး ကလေးမှ (၄၄) မိုင် တီးတိန်မှ (၁၃) မိုင်ဝေးကွာသလို ယခုလိုမိုးရာသီမှာ ချင်းတောင်ပန်းသီးများ အမြောက်အများ ထွက်ရှိတဲ့ ကျေးရွာလေးဖြစ်ကြောင်း ကြားသိရပါတယ်။
Source - Huailek