မိဘတိုင်းဟာ ကိုယ့်သားသမီးရဲ့အပြုံးကိုမြင်ချင်ပြီး သားသမီးပျော်ရွှင်အောင်ဖန်တီးပေးချင်တဲ့စိတ်မျိုး ရှိကြပါတယ်။ ဒီနေ့မှာလည်း ဂစ်တာရောင်းသူတစ်ယောက်ဟာ သူ့ဆိုင်မှာတွေ့ကြုံခဲ့တဲ့ အဖြစ်အပျက် တစ်ခုကို အားလုံးသိရအောင်ပြန်လည်ဝေမျှခဲ့ပါတယ်။ ဈေးရောင်းနေတဲ့ မိခင်တစ်ယောက်ဟာ မျက်စိမမြင်တဲ့သူမသားလေးရဲ့ ဆန္ဒကိုဖြည့်ဆည်းပေးချင်တဲ့စိတ်ကြောင့် ဂစ်တာဆိုင်ထဲကိုဝင်လာခဲ့ပြီး သားလေးအတွက်ဂစ်တာတစ်လုံးဝယ်ပေးဖို့စိတ်ကူးခဲ့ပါတယ်။ ဆိုင်မှာဈေးအနည်းဆုံးဂစ်တာဟာ (၃၅၀၀၀) ဝန်းကျင်ရှိခဲ့တာကြောင့် သူမလက်ထဲမှာကိုင်ထားတဲ့ ငွေနဲ့ဝယ်ဖို့မလောက်ငနိုင်ပါဘူး။
ဒီအချိန်မှာတော့ သူမလက်ထဲမှာပါလာတဲ့ငွေငါးထောင်ကို ဆိုင်ရှင်ဖြစ်သူကိုပေးပြီး နေ့တိုင်း ဈေးရောင်းရတဲ့ငွေလေးနဲ့ (၃၅၀၀၀) ပြည့်အောင်သွင်းပေးမှာဖြစ်ကြောင်းနဲ့ သတ်မှတ်ထားတဲ့ ငွေပြည့်သွားရင်တော့ သူမရဲ့သားလေးအတွက်ဂစ်တာလေးပေးနိုင်ဖို့ သားလေးကိုင်ထားတဲ့ ဂစ်တာအပြာလေးကိုချန်ထားပေးဖို့ မေတ္တာရပ်ခံခဲ့ပါတယ်။ ဆိုင်ရှင်ဖြစ်သူဟာလည်း မိခင်ရဲ့ စကားကြောင့်အတော်လေးစိတ်မကောင်းဖြစ်သွားခဲ့တယ်လို့ ဆိုပါတယ်။
ငွေကြေးတွေအများကြီးမချမ်းသာပေမယ့် သူမရဲ့သားလေးကိုတော့ စိတ်ချမ်းသာအောင် ဖြည့်ဆည်းပေးချင်တဲ့မိခင်ရဲ့မေတ္တာကတော့ အတော်လေးကိုကြီးမားပါတယ်။ ကလေးကတော့ မျက်စိမမြင်တဲ့အတွက် မိခင်ရဲ့ပူပန်မှုကို မမြင်တွေ့ဘဲ သူလိုချင်တဲ့ဂစ်တာလေးကိုကိုင်ပြီး ပျော်ပျော်ရွှင်ရွှင်တီးခတ်နေခဲ့တယ်လို့လည်းဆိုပါတယ်။ နောက်ဆုံးမှာတော့ ဆိုင်ရှင်ဖြစ်သူဟာ ငွေငါးထောင်နဲ့ပဲ ဒီဂစ်တာလေးကိုရောင်းချလိုက်တဲ့အကြောင်း အားလုံးကိုပြောပြလာခဲ့ပါတယ်။ စာဖတ်သူတွေဟာလည်း ဆိုင်ရှင်ရဲ့မေတ္တာစေတနာကို အသိအမှတ်ပြုပြီး ဝယ်သွားတဲ့ သားအမိကိုယ်စား ကျေးဇူးတင်စကားတွေပြောခဲ့ကြပါတယ်။
သတင်း အရင်းအမြစ်៖ Linn Moe's FB Acc