လတ်တလော ကယားပြည်နယ်အတွင်းရှိ ဒီးမော့ဆိုမြို့နယ်မှာ ပြည်သူ့ကာကွယ်ရေးတပ်တွေနဲ့ အာဏာရှင်လက်အောက်ခံတပ်တွေကြား တစ်ကျော့ပြန် ထိတွေ့တိုက်ပွဲတွေ ပြန်လည်ဖြစ်ပွားလာနေတာကိုတွေ့ရပါတယ်။ တစ်ဖက်ကလည်း မြို့ပေါ်ဒေသတွေကိုပါအင်အားအလုံးအရင်းနဲ့ ထိုးစစ်ဆင်မှုတွေ ပြုလုပ်လာခဲ့ပြီး လက်နက်ကြီးတွေနဲ့ပါ ပစ်ခတ်နေတာပါ။ လက်ရှိမှာဆိုရင်လည်း ဒေသခံပြည်သူတွေက ဘေးလွတ်ရာတွေမှာ နေအိမ်တွေစွန့်ခွာပြီး ထွက်ပြေးတိမ်းရှောင်နေကြရတာဖြစ်ပါတယ် ။
ပြည်သူ့ကာကွယ်ရေးတပ်တွေဘက်မှာလည်း အထိအခိုက်အကျအဆုံးများလာသလို တစ်ဖက်မှာလည်း ထိခိုက်သေဆုံးမှုတွေများလာနေတာကို တွေ့ရပါတယ်။ ယမန်နေ့ကလည်း ဒီမောဆို့မြို့နယ်ဘက်မှာ တိုက်ပွဲတွေအပြင်းအထန်ဖြစ်ပွားခဲ့ပြီး ပြည်သူတို့ရဲ့နေအိမ်တွေပါ မီးရှို့ဖျက်ဆီးခံခဲ့ရတယ်လို့ သိရပါတယ်။
ဒီမောဆို့အခြေစိုက် လူမှုကွန်ယက်စာမျက်နှာတစ်ခုကနေ မကြာသေးမီက Facebookစာမျက်နှာမှာ ကုန်းသာကျေးရွာရှိလူနေအိမ်အတော်များများ မီးရှို့ဖျက်ဆီးခံထားရတဲ့ ပုံရိပ်တွေကို တင်ပေးလာပါတယ်။ အသက်ဘေးလွတ်အောင် တိမ်းရှောင်နေရတဲ့ ပြည်သူတွေခမျာမှာလည်း အခုလိုအနှစ်နှစ်အလလစုဆောင်းထားရတဲ့ နေအိမ်တွေပျက်ဆီးသွားတာကြောင့် ယူကျုံးမရဖြစ်နေကြရတာလည်းဖြစ်ပါတယ်။
သတင်း အရင်းအမြစ်៖ New Light in Karenni's Facebook page