မြန်မာနိုင်ငံရဲ့ နွေဦးတော်လှန်ရေးကြီးကတော့ တစ်ရက်ပြီးတစ်ရက်ကုန်ဆုံးလာပေမယ့် ပြည်သူလူထုကတော့ လူထုလှုပ်ရှားမှုတွေကို နေ့တိုင်းဆောင်ရွက်နေကြဆဲဖြစ်ပါတယ်။မြို့နယ်အသီးသီးမှာနေထိုင်နေကြတဲ့ ပြည်သူတွေကလည်း လှုပ်ရှားမှုတိုင်းကို စည်းစည်းလုံးလုံးလုပ်ဆောင်ကြပြီး တစ်ယောက်ကိုတစ်ယောက် ကူညီဖေးမရင်း ခုခံကာကွယ်ပေးကြတာ ဖြစ်ပါတယ်။နိုင်ငံတကာကလည်း ဒီနေ့အထိ မြန်မာ့အရေးကို စောင့်ကြည့်နေကြဆဲဖြစ်ပါတယ်။
ဒီရက်ပိုင်းမှာတော့ နွေဦးတော်လှန်ရေးကြီးဟာ ပြန်လည် အသက်ဝင်လာကာ တစ်ရက်ထက်တစ်ရက် ပိုမိုအားကောင်းလာခဲ့တာလည်းဖြစ်ပါတယ်။ရန်ကုန် မန္တလေး အပြင် အခြား မြို့ကြီးတွေရဲ့ လမ်းမတွေထက်မှာ လူငယ်တွေရဲ့ ပုံသဏ္ဌာန် မျိုးစုံနဲ့ချီတက်နေတဲ့ သပိတ်စစ်ကြောင်းတွေကိုတွေ့မြင်ခဲ့ရပါတယ်။လမ်းပေါ်မထွက်နိုင်သူတွေကလည်း မိမိတို့ပတ်ဝန်းကျင်မှာပဲ လှုပ်ရှားနိုင်မယ့် strike တွေကို အင်တိုက်အားတိုက် ပြုလုပ်ကာ ငြိမ်းချမ်းစွာဆန္ဒထုတ်ဖော်နေကြတာပါ။
မန္တလေးမှာဆိုရင်လည်း နေ့ရက်တိုင်း ရပ်ကွက်အသီးသီးက သပိတ်စစ်ကြောင်းတွေကို တွေ့မြင်ရပါတယ်။ယနေ့ မေလ (၉) ရက်နေ့မှာဆိုရင်လည်း မန္တလေးက ကျောင်းသူကျောင်းသားတွေ စုပေါင်းကာ မိမိတို့ရင်ထဲက ခံစားချက်တွေကို ထုတ်ဖော်ရေးသားထားတဲ့ ဆိုင်းဘုတ်တွေ ကိုယ်စီကိုင်ဆောင်ရင်း ငြိမ်းချမ်းစွာ ဆန္ဒထုတ်ဖော်ခဲ့ကြပါတယ်။သပိတ်စစ်ကြောင်းအပြီးမှာ အရပ်ဝတ်နဲ့ လာရောက်ပစ်ခတ် ဖြိုခွင်းခံခဲ့ရပေမယ့် လူထိခိုက်မှုမရှိဘဲ အောင်မြင်စွာ လူစုခွဲနိုင်ခဲ့တယ်လို့လည်းသိရပါတယ်။လူငယ်လေးတွေရဲ့ သတ္တိတွေကတော့ တကယ်လေးစားစရာပါပဲနော်။