ကယားတိုက်ပွဲရှောင် ပြည်သူတွေအတွက် တတ်နိုင်သလောက် လိုအပ်နေတာလေးတွေကို သွားရောက်ကူညီ လှူဒါန်းပေးခဲ့တဲ့ ဝေဠုကျော်

မင်းသားကြီး ဝေဠုကျော်ကတော့ အနုပညာအလုပ်တွေထက် ပြည်သူတွေအတွက် အကျိုးပြုစေမယ့် ပရဟိတလုပ်ငန်းတွေကို ကိုယ်တိုင် ဦးဆောင်ပြီး စွမ်းစွမ်းတမံ လုပ်ဆောင်ပေးနေတဲ့ အနုပညာရှင်တစ်ဦး ဖြစ်လာခဲ့ပါပြီ။ ဝေဠုကျော်ရဲ့ ပရဟိတလေးဟာ အလှူရှင်များရဲ့ စုပေါင်းကုသိုလ်ဖြင့် တစ်နိုင်ငံလုံးက အခက်အခဲဖြစ်နေတဲ့ သူတွေအတွက် လိုအပ်တာတွေကို ကူညီထောက်ပံ့ လှူဒါန်းပေးနေတာ ဖြစ်ပါတယ်။

ဒါ့အပြင် ဝေဠုကျော်ဟာ ကိုဗစ်ကပ်ရောဂါ ဖြစ်ပွားနေတဲ့အချိန်လေးမှာလည်း ကျန်းမာရေးဝန်ထမ်းတွေနဲ့အတူ ရှေ့တန်းကနေ အားဖြည့် ကူညီပေးခဲ့ပါသေးတယ်။ ဒီလိုပြည်သူ့အကျိုးတွေကို စိတ်ရောကိုယ်ပါ လုပ်ဆောင်ပေးနေတာကြောင့် ပရိသတ်တွေကလည်း လေးစားချစ်ခင်နေရတာ ဖြစ်ပါတယ်။ မွန်မြတ်တဲ့ လှူဒါန်းမှုတွေကို မကြာခဏပြုလုပ်နေတဲ့ ဝေဠုကျော်ဟာ ယခုမှာ အလှူလေးတွေ ထပ်မံပြုလုပ်ခဲ့တာကို ဖော်ပြလာခဲ့ပါတယ်။

ဒါကတော့ ကယားပြည်နယ်မှာ ဖြစ်ပွားနေတဲ့ တိုက်ပွဲတွေကြောင့် ရှမ်းပြည်နယ်အတွင်းကိုထွက်ပြေးတိမ်းရှောင်နေရတဲ့ ပြည်သူတွေအတွက် အလှူငွေ၊ဆန်၊စောင် နှင့် အနွေးထည်အသစ် ၊အဝတ်အထည်အသစ်များကို တတ်နိုင်သလောက် သွားရောက် ကူညီ ထောက်ပံ့ပေးခဲ့တာ ဖြစ်ပါတယ်။ ဝေဠုကျော် လှူဒါန်းပေးခဲ့တဲ့ နေရာတွေကတော့ နောင်တရား၊ ပင်လောင်း၊ ဆီဆိုင်မြို့စတဲ့ မြို့များဖြစ်တယ်လို့ သိရပါတယ်။

သတင်း အရင်းအမြစ်៖ Source - Wai Lu Kyaw foundation