အဆီကျပြီး ပိန်ချင်တဲ့သူပဲဖြစ်ဖြစ်၊ အသားကျစ်ပြီး ကိတ်ချင်တဲ့သူပဲဖြစ်ဖြစ်၊ ခန္ဓာကိုယ်သန်မာဖို့ လိုတဲ့ အားကစားသမားတွေဖြစ်ဖြစ် အားလုံးနဲ့ သင့်တော်တာက ထိုင်ထလေ့ကျင့်ခန်း (Squats) ပဲ ဖြစ်ပါတယ်။
ထိုင်ထလုပ်ရင် ရမယ့်အကျိုးကျေးဇူးတွေက တင်ပါးနဲ့ ခြေထောက်ကြွက်သားအားလုံးကို ကျစ်လျစ် သန်မာစေတာအပြင် ဝမ်းဗိုက်ကြွက်သား၊ နောက်ကျောနဲ့ core ကြွက်သားတွေကိုပါ ကျစ်လျစ်စေတယ်လို့ သိရပါတယ်။
လူတိုင်း ထိုင်ထ လုပ်ဖူးပါတယ်။ ဒါပေမဲ့ ထိုင်ထရဲ့ ပုံစံအမှန်ကို သိတဲ့သူ နည်းပါတယ်။ဒါကြောင့် လုပ်ရလွယ်ကူပြီး ထိခိုက်ဒဏ်ရာ မရအောင်နဲ့ လေ့ကျင့်ခန်း ပိုထိရောက်အောင် လိုက်နာသင့်တဲ့ နည်းလမ်းလေးတွေကို ဒီနေ့ ဖော်ပြချင်ပါတယ်။
ပထမဆုံး ခြေထောက်နှစ်ဖက်ကို တင်ပါးအကျယ်ထက် နည်းနည်းလေး ခွာရပ်လိုက်ပါ။ ခြေချောင်းထိပ်နှစ်ဖက်က ဘေးဘက်ကို နည်းနည်း ထွက်ထားပါ။
ထိုင်ထ လုပ်နေတဲ့ တစ်လျှောက်လုံးမှာ ဗိုက်ကြွက်သားတွေ တင်းရင်းနေအောင် ညှစ်ထားရပါမယ်။
စထိုင်မယ်ဆိုတာနဲ့ အသက် ဝဝရှူသွင်းပါ။
ခြေထောက်ကို ကွေးမချခင် တင်ပါးကို အရင် အနောက်ကို ပစ်လိုက်ပါ။ ထိုင်ခုံတစ်ခုံပေါ် ထိုင်ချလိုက်တဲ့အတိုင်း တင်ပါးကို အနောက်ပစ်ရပါမယ်။ ( ဆွဲဆောင်မှု ရှိ ရှိလေးပေါ့နော်) ပြီးမှ ခြေထောက်က လှုပ်ရှားပါ။
ထိုင်ချလိုက်တဲ့အချိန်မှာ လက်ကို အရှေ့ကို ဆန့်ထုတ်ပါ။ ခေါင်းနောက်မှာ ထားလည်း ရပါတယ်။
အရေးကြီးတာက မျက်လုံးသည် ရှေ့တည့်တည့်ကို ကြည့်နေရပါမယ်။ ရင်ဘတ်ကို ဖွင့်ပြီး မတ်ထားပါ။ ခါးကိုလည်း မကွေးသွားစေပါနဲ့။
ခြေထောက်ဟာ ကြမ်းပြင်နဲ့ အပြိုင်ဖြစ်တဲ့အထိ ထိုင်ရပါမယ်။ အဲဒါမှ ထိရောက်မှာပါနော်။
ပြီးရင်တော့ အသက်ကိုရှူထုတ်ပြီး ပြန်ထလို့ ရပါပြီ။ သတိထားရမှာက ဗိုက်ကြွက်သားတွေကို ညှစ်ထားဖို့ပါ။
အကြိမ်ရေကတော့ စစချင်းဆို ၁၂ ကြိမ် ၃ ကျော့ကနေ နောက်ပိုင်း တဖြည်းဖြည်း တိုးသွားသင့်ပါတယ်။ ကိုယ်က လေ့ကျင့်ခန့် လုပ်နေကျ၊ ကျွမ်းနေပြီဆိုရင်တော့ အလေးတုံးလေးတွေ၊ Resistance band တွေ ထည့်ပြီးတော့ပါ ကစားပေးနိုင်ပါတယ်။
လှပကျန်းမာတဲ့ ခန္ဓာကိုယ်လေးတွေ ပိုင်ဆိုင်နိုင်ပါစေ။