ယုံကြည်မှုလွန်ကဲမှုကြောင့် စစ်သားလူထွက်တစ်ဦး ပါးစပ်ပွင့်ထွက်ခဲ့တဲ့ ဖြစ်ရပ်တစ်ခုဟာ ထိုင်းနိုင်ငံမှာ ဖြစ်ပွားခဲ့ပါတယ်။ ဖြစ်ရပ်ကတော့ ယမန်နေ့က ထိုင်းနိုင်ငံအရှေ့ဘက် ဘွန့်ကန်းခရိုင်၊ ဘွန့်ခိုလုံမြို့မှာ နေထိုင်တဲ့ အသက် (၃၄) နှစ်အရွယ် စစ်သားလူထွက်တစ်ဦးဟာ မိတ်ဆွေ၊ သူငယ်ချင်းများနှင့် သောက်စားနေချိန် သူ့လည်ပင်းမှာဆွဲထားတဲ့ အဆောင်ပစ္စည်းက စစ်သားဘဝတုန်းက ပေါက်ကွဲမှုနဲ့ကြုံတွေ့တိုင်း အသက်ဘေးက သီသီလေးလွတ်ခဲ့တဲ့အထိ အင်မတန်အစွမ်းထက်ကြောင်း ပြောဆိုခဲ့ပါတယ်။
ယင်းနောက် သူ့ရဲ့အဆောင်ပစ္စည်းရဲ့ အစွမ်းကို လက်တွေ့ကျကျ ပြသဖို့အတွက် ကလေးတွေ ပစ်ပေါက်ဆော့ကစားတဲ့ ဗျောက်အိုးကို ပါးစပ်ထဲထည့်ပြီး ဖောက်ပြခဲ့တာ ဖြစ်ပါတယ်။ ပထမဆုံးအကြိမ် ဖောက်ပြခဲ့တဲ့ ဗျောက်အိုးဟာ တကယ်လည်း မပေါက်ကွဲခဲ့လို့ နောက်တစ်လုံးကိုယူပြီး ပါးစပ်ထဲထပ်မံ ဖောက်ပြရာမှာတော့ အချိန် (၅) စက္ကန့်လောက်မှာပဲ ပေါက်ကွဲမှု ဖြစ်သွားခဲ့ပါတယ်။
ဗျောက်အိုးထကွဲမှုဟာ ပြင်းထန်ခဲ့တာကြောင့် အဆိုပါ စစ်သားလူထွက်ဟာ ကံဆိုးစွာနဲ့ ပါးစပ်တစ်ခုလုံး ရစရာမရှိအောင် ရုပ်ပျက်ဆင်းပျက် ဖြစ်သွားခဲ့ပါတယ်။ လက်ရှိမှာတော့ ပါးစပ်တစ်ခုလုံး ပျက်စီးသွားခဲ့တာကြောင့် ဆေးရုံမှာတက်ရောက်ကုသနေရကြောင်း သိရပါတယ်။ ဒီဖြစ်စဥ်ဟာ လူမှုကွန်ယက်ပေါ်မှာ ပျံ့နှံ့သွားပြီး ဝေဖန်မှုတွေလည်း မြင့်တက်သွားခဲ့ပါတယ်။
သတင်း အရင်းအမြစ်៖ Source - PPTV